النائبة سحر طلعت مصطفى تواجه وزير الشباب والرياضة بـ 5 ملفات ساخنة في البرلمان

واجهت النائبة سحر طلعت مصطفى، وزير الشباب والرياضة بـ 5 ملفات ساخنة خلال جلسة اليوم الخميسي بالبرلمان.. وجاءت الملفات  كالتالي

1. انتقدت بطء تطوير ملاعب كرة القدم بمراكز الشباب قائلة: "أنا متوقفة أمام آخر تقرير للجهاز المركزى للتعبئة والإحصاء.. احنا عندنا في مصر 4374 مركز شباب.. والحقيقة إن برنامج الحكومة إتكلم فقط عن تطوير 490 ملعب خماسى وقانونى في مراكز الشباب بمختلف محافظات مصر.. يعنى إحنا طورنا ملاعب كرة قدم فى 11% من مراكز الشباب في مصر فقط .. النسبة غير مرضية .. وعاوزة أعرف إيه خطتنا في باقى المراكز ؟!".

2. استنكرت عدم الاهتمام برياضة السيدات في المحافظات، بقولها: "للأسف السيدات والبنات في مصر مبيروحوش مراكز الشباب، ودا واضح جداً من أعداد العضوات في مراكز شباب الأقاليم والصعيد تحديداً، مفيش أى أنشطة مناسبة ليهم، ولا فيه بيئة مناسبة أو خصوصية تخليهم يشتركوا في مراكز الشباب، ودا خلى نسبة اللى بيمارسوا أنشطة رياضية من العضوات، 5% فقط على مستوى مصر كلها، المدهش بقى إن الوضع ده مستمر بقاله 10 سنين ومحدش فكر يوفر بيئة جاذبة للسيدات في مراكز الشباب، ودا موضوع متعلق مباشرة ببناء الإنسان المصرى، فهل هناك خطة واضحة للوزير لتصحيح تلك الأوضاع ؟!".

3. دافعت عن حق أصحاب الألعاب الفردية فى إهتمام من الحكومة، بقولها: "حصل إخفاق في ألعاب جماهيرية كبيرة، زى كرة الطايرة، وغيرها من الألعاب الفردية، احنا لم ننجح في التأهل لأولمبياد طوكيو، وخدنا المركز الرابع في كأس إفريقيا، وفِي كرة السلة فشلنا أيضا في التأهل للأولمبياد".

 4. واجهت الوزير بفضيحة إيقاف نشاط رفع الاثقال في مصر لمدة سنتين من الإتحاد الدولى بسبب ثبوت تعاطى 7 لاعبين مصريين للمنشطات، واستنكرت في حديثها مع الوزير: "رغم إن حضرتك أحلت رئيس إتحاد رفع الاثقال للنيابة، لكن فوجئنا إنه تم تشكيل لجنة لتسيير أعمال للاتحاد برئاسة نفس الشخص!".

5. سألت الوزير عن كؤوس افريقيا، بقولها: " أحب أسأل معالى الوزير في نهاية كلمتى، فين كؤوس افريقيا اللى اتسرقت من مقر اتحاد الكورة يا فندم؟!، وليه مرجعتش لغاية دلوقتى؟!، لو فيه جديد في هذا الأمر ياريت توضحلنا".