مدينة الصناعات الغذائية.. الرئيس السيسي يوجه بتنفيذ مبادرة "للكشف على الراغبات فى الإنجاب"

وجه الرئيس عبدالفتاح السيسي، رئيس الوزراء بتنفيذ مبادرة للكشف وتوعية الراغبات في الإنجاب، مضيفا: "نقدر نعمل مبادرة الرغبة في الإنجاب ان احنا نعمل كشف على الراغبات في هذا الأمر لمدهم ببرنامج صحى معين قبل الحمل لتوعية الناس لأنها قصة كبيرة جدا".

وأضاف الرئيس السيسي خلال افتتاح شركة سايلو فودز: "هل مبادرة الكشف على الراغبات في الانجاب ممكن نشتغل عليها ..الأسرة مسؤولة على تهيئة الظروف لإنجاب طفل .. دى روح يا جماعة هتيجي وهتبقا عايشة، ولابد أن نوفر لها أنسب الظروف فيه أقدار لكن فيه أسباب الدنيا يجب أن تكون الام مستعدة".

الرئيس السيسي: جاء الوقت لرفع سعر الخبز

أكد الرئيس عبد الفتاح السيسي، أنه حان الوقت رفع سعر رغيف العيش اللي بـ5 صاغ يزيد تمنه"، موجها حديثه للمواطنين: "أنا بقولها على الهوا لكل المصريين عشرين رغيف بتمن سيجارة".

وفي سياق آخر، وجه الرئيس عبد الفتاح السيسي، الحكومة اليوم الثلاثاء، بزيادة سعر رغيف الخبز المدعم.

وأضاف "السيسي"، خلال كلمته على هامش افتتاح المدينة الصناعية الغذائية سايلو فودز بمدينة السادات، اليوم الثلاثاء، إنه جاء الوقت لزيادة ثمن رغيف الخبز.

وتابع: "الناس يقولوا ده كلام خلي وزير التموين يشيلها لا أنا اللي أشيلها قدام بلدي وناسي، مش معقول ادي 20 رغيف بثمن سيجارة هذا الأمر لا بد أن يتوقف".

وأشار: "مينفعش أبيع رغيف الخبز بعملة مش معروفة، الأولاد ميعرفوش يعني إيه 5 ساغ".

متابعا: "عاوزين ننظم حياتنا كويس.. وعاوزين نطلع منتج محترم.. وعاوزين نحترم آدمية الناس.. وعاوزين ننظم حياتنا بشكل فيه توازن".

وتابع الرئيس السيسى: "الـ 8 مليار جنيه الخاصين بالتغذية لازم يتوفروا.. واحنا بنعمل برنامج "حياة كريمة" لتطوير الحياة داخل الريف.. ولازم يكون فيه عطاء متوازن.. أنا مش بتكلم على رقم كبير ولا حاجة".

الرئيس السيسي يحذر من قضية الزيادة السكنية وتنظيم الإنجاب

أكد الرئيس عبدالفتاح السيسي، على أهمية قضية الزيادة السكانية وتنظيم الإنجاب في مصر.

وقال الرئيس: "تنظيم الإنجاب فى مصر بيسَمع فى موضوعات كييرة وتحدى فى موضوعات كثيرة أيضا، والتعدى على الأراضى الزراعية عبارة عن نمو سكانى وبالتالى زيادة الطلب على السكن، وتساءل: "يا ترى محتاجين نستمر بالنمو السكاني بالطريقة دي؟".

وأضاف الرئيس خلال افتتاح شركة سايلو فوودز:"قضية النمو السكاني في منتهى الخطورة، لما نيجي من 2011 إلى اليوم ما يقرب من 20 مليون زيادة ، طيب يا ترى الأسعار بتبقا غالية ليه لأن حجم الطلب بيزيد.. وبالطريقة اللى احنا ماشيين فيها في النمو السكاني كل الجهد اللى بنعمله.. إحنا مش بنمن على أهلنا وده دورنا ولو مش قادرين نمشى".