خالد الغندور: «الزمالك» لن يصمت عن حقه في أزمة كهربا
أكد خالد الغندور عضو اللجنة الفنية فى الزمالك أن النادى الأبيض لن يصمت على حقه، فى عدم تنفيد عقوبة محمود عبد المنعم كهربا لاعب الأهلى والتى أقرتها لجنة الانضباط ومدتها 12 مباراة وغرامة مليون جنيه.
أضاف الغندور خلال تصريحات تلفزيونية:"في إجتماع مصيري يوم الأحد لمجلس الإدارة لتحديد مشاركة الزمالك بالسوبر أم لا، وأعلن المستشار مرتضى انه لن يذهب للإمارات رغم انه إستأنف على قرار منعه لمدة شهرين من دخول الملاعب، ونعلم ان الإستئناف لا يوقف العقوبه".
«الأهلي» لوَّح بالانسحاب من «السوبر» بعد صدور قرار عقوبة كهربا
أضاف الغندور:"الأهلي لوح بالإنسحاب من السوبر بعد صدور قرار عقوبة كهربا، وفوجئنا بتسريبات من صحفيين داخل إتحاد الكرة والاستاذ وليد العطار المدير التنفيذي الذي ليس له علاقه بالقرار، قالوا لو الأهلي إستأنف العقوبه هتتوقف".
تابع:"وفوجئنا بالكابتن أحمد شوبير وهو أهلاوي وابنه بيلعب بالاهلي وله علاقه بالمسئولين وبيتكلم مباشره مع المستشار عادل الشوربجي رئيس لجنة التظلمات وقال علمنا من مصادرنا انه لن ينظر في الإستئناف إلا بعد السوبر، ليه مش هينظر إلا بعد المباراة؟.
كمان أستاذ وليد العطار قال الاستئناف يوقف العقوبة، وسألت في الإتحاد الأستاذ وليد العطار بيصرح بصفته ايه،وسألوه وقالهم انا صرحت لان المستشار عادل الشوربجي قالي كده".
خالد الغندور يقارن بين عقوبة كهربا وإمام عاشور
وواصل:"بسأل عندما عوقب كهربا بـ12 مباراة خرج بيان من الأهلي ان اللجنه غير قانونيه ومفيش سند للعقوبه، وأيام امام عاشور واللجنة الموجوده رئيسها صديق كابتن محمود الخطيب وعمره ماقال انه اللجنة مش قانونيه وقال عقوبه غير رادعه ولا قال جبتوا 12 منين مفيش لايحه، ومكنش عجبه عقوبة إمام عاشور وقال ان العقوبه تكون رادعه لان إمام قدوة ومثل للشباب".
إمام عاشور اخطئ؟ اه اخطئ، في موضوع كهربا الأهلي شاف إن اللجنة مش قانونيه والـ12 مباراة كتير وده دبح لكهربا، ومشافش ان كهربا مثل وقدوة واخطئ ولم يصدر قرار ضده من الأهلي ولاقال لازم تكون رادعه بل هدد بالإنسحاب من السوبر..
الغندور: «الأهلي» لوَّح بالانسحاب علشان يفرد عضلاته وأنا أقوى من أي حد
واستطرد:"الأهلي لوح بالإنسحاب علشان يفرد عضلاته وانا أقوى من اي حد، وكهربا مش هيتوقف، كلنا مع فكرة الانسحاب انا وميدو كابتن طارق يحيى وجماهير الزمالك ولكن في النهايه القرار لمجلس الإدارة".
وأكمل:"عمرها ماحصلت ان الإستئناف أوقف العقوبه وفي وجود نفس المستشار عادل الشوربجي مين قاله غير لوايحك وقوانينك، هم فاكرين الزمالك ضعيف وهفأ، ونجي على الزمالك والأهلي لا".
تابع:"هفضل اقولها علشان أعمى البصيرة يشوف، رئيس لجنة التظلمات في فيديو مع الزميل هاني حتحوت قال الإستئناف لايوقف العقوبه، وتحدث عبر السنين وعمرها ما حصلت في تاريخ مصر، وقال في خلال10 أيام بنجمتع، والنهارده28 ابريل والمفروض كان اجتمع يوم 27 من الشهر هيقول أجازة، يجتمع يوم الاحد الجاي ويتخذ قرار، لكن التسويف ويطلع كابتن شوبير يقول محدش هيناقش الاستئناف على العقوبة قبل السوبر واخبطوا دماغكم في الحيط".
وواصل:"كابتن شوبير بيقول محدش هينسحب وبيقول ان الاهلي والزمالك غلط، لا الحق حق والباطل باطل واللي يتنازل على حقه ويتقارن الباطل بالحق لا، والمستشار عادل الشوربجي ماتفعله لن يبقيك في منصبك".
الغندور: إحنا مش مغفلين.. كفايه تقلبوا الباطل حق محدش هيدينا على قفانا
احنا مش مغفلين كفايه تقلبوا الباطل حق محدش هيدينا على قفانا احكموا بما يرضي الله وباللوائح اللي بتغيروها على المزاج..
الإعلام المدلس اللي بيقلب الباطل حق اسمعوا رئيس لجنة التظلمات بيقول ايه الرجل نفسه قال أليس هذا إستفزاز إن لاعب عامل مصيبه ومعاقب ويشارك وقال القرار بعد 10 ايام وكان لازم يجتمع مبيجتمعش ليه مش عارف، وقال الاستئناف لايوقف العقوبه والمستشار عزت خميس رئيس لجنة الإنضباط قال الإستئناف لايوقف العقوبه وتظل ساريه، كل حاجه واضحه اللي عاوز يدلس يدلس واللي إنتماءه يغلب على ضميره هو حر..
الغندور: كهربا لا هو ميسي ولا طاهر أبوزيد ولا رونالدو
وأكمل:"كهربا لاهو ميسي، ولاطاهر أبوزيد، ولا رونالدو، ولا هو هيكسب أويخسر الأهلي، كهربا لاعب كويس زي غيره والقصه مش يلعب او لا لكن القصه حق ربنا وعدل ومواقف سابقه للاعبي ومدربي مصر وكل حاجه حصلت مع عادل الشوربجي، هل الأهلي على راسه ريشه والقانون بيقوله انت الأهلي قوي واخاف تمشيني من منصبي".
تابع:"إحنا مش هنسيب حقنا ولو حصل يبقى في حد باللجنه والإتحاد حاطط الأهلي على راسه ريشه، والله والله والله لوسمح لكهربا يشارك في السوبر يبقى انتم ناس ظالمين وبتقولوا كلام بتعملوا غيره، كل حاجه حصلت بتوضح المواقف لو عاوزين تلووا الحقائق وقلبكم اعمى يبقى احنا في منظومه تفسد الرياضه في مصر بعدم تطبيق اللوائح وتخلي ناس على راسها ريشة".
واختتم:" في 60 الف سلامه بطوله، لكن كرامه الزمالك وحقه الزمالك، الزمالك عاوز حقه لامواخذه مش عاوز حاجه غير حقه، هفضل كل يوم أدور على حق الزمالك وكل مصر شايفه المواقف وشايفه 18 يوم ولجنة الإستئناف وكابتن أحمد شوبير يقول بعد السوبر نشوف، لا والله".
