على مكتب الرئيس

بقلم : محمد على خير

واحنا كمواطنين ملهيين في فيروس كورونا..تعالي نشوف الدولة مشغولة دلوقتي في ايه ودماغها هيقف من كثرة التفكير بسبب الأتي

١-الحكومة بدات السنة المالية بعجز مالي يقترب من 600 مليار جنيه في ميزانيتها وطبعا استلفتهم .

٢-فجأة حصل هلع فيروس كورونا في العالم فاقتصادنا هيتأثر جامد..ايراد قناة السويس هيتراجع بسبب توقف حركة التجارة الدولية وايراد قناة السويس مهم جدا للحكومة..حوالي ٦ مليار دولار

٣-ولسة الحكومة بتستوعب تراجع ايراد قناة السويس حصل كمان الغاء ٧٠% من حجوزات السياح وده خراب مستعجل للحكومة وللعاملين ف القطاع السياسي

٤- ولأن المصايب لاتأتي فرادي فالمؤكد ان شركة مصر للطيران هتخسر كتير بسبب توقف اغلب رحلاتها لدول العالم اللي قفلت مطاراتها وكمان البترول نزل سعره للنص وده ممكن يؤثر علي تحويلات المصريين بالخارج للبنوك المصرية

٥-ولأن الصين قافلة مصانعها واحنا بنستورد ب١٤ مليار دولار ولازم بديل لها وهو اوروبا اللي اسعار حاجتها هتكون اغلي من اسعار الصين مما سيضغط علي شوية الدولارات اللي حيلتنا

٦- في وسط كل ده.. مطلوب من وزير المالية تدبير ١٠٠ مليار جنيه لمحاصرة فيروس كورونا مثلما أعلن الرئيس

أكيد كل ده ضاغط علي اعصاب الحكومة والقيادة السياسية ..خاصة اننا لسة خارجين من تجربة اصلاح اقتصادي وبنلتقط انفاسنا

تخيل بقي والريس والحكومة قاعدين يحسبوها يمين وشمال ييجي موضوع سد النهضة وتعنت اثيوبيا ومطلوب من الدولة التعامل معه بحنكة وعدم الانزلاق الي حرب..متنساش بالمرة ان كل ده كوم وهاجس انتشار فيروس كورونا بين المصريين ضاغط ايضا علي قيادات الدولة والكل حاطط ايده علي قلبه..واستمرار ازمة كورونا عالميا..لايتحمله اقتصادنا الا شهرين بس..اكتر من كده هيبقي صعب قوي..متنساش ان ٦٠% من اكلنا بنستورده..طيب لو العالم استمر قافل علي نفسه..هنعمل ايه

ده جزء من الصورة اللي علي مكتب رئيس الجمهورية ومعه اجهزة الدولة..بلدنا فعلا في ازمة وتواجه ظروفا صعبة تتطلب ان يكون المواطن علي مستوي المسؤولية..ايه رايك بقي..مش شايف اننا فعلا لازم ندعم الدولة وكمان نحط ايدينا في ايد بعض ..ملناش الا كده بعد كل دولة ماقفلت علي نفسها وبتقول يلا نفسي.

احنا في لحظة فارقة ولازم نكون علي قد المسؤولية..ومفيش مسؤول هيطلع يقول لك الكلام ده ولا حتي الرئيس نفسه ..ساعتها هيخرج كلاب السكك تنهش ف البلد وتنتهزها فرصة..ياريت نبطل شكوي من حاجات صغيرة مضايقانا وفكر في التحدي اللي بيواجه البلد الان..لان ماتعلمه كمواطن هو قليل جدا

اللهم احفظ مصر

احنا في لحظة فارقة ولازم نكون علي قد المسؤولية..ومفيش مسؤول هيطلع يقول لك الكلام ده ولا حتي الرئيس نفسه ..ساعتها هيخرج كلاب السكك تنهش ف البلد وتنتهزها فرصة

اعلامى - مقدم برنامج المصرى أفندى بقناة «القاهرة والناس»