الرئيس السيسى: ما يصحش ننسى وقفة الأشقاء العرب معانا وننساق وراء مواقع محرضة
قال الرئيس عبد الفتاح السيسي، إن مصر تقدر علاقاتها الطيبة مع الأشقاء ولا تقبل الإساءة أو الانسياق وراء الفتن، مؤكدا على أن علاقاتنا رشيدة ومتزنة مع الجميع وخاصة الأشقاء.
تابع:" ما يصحش ننسى وقفة الأشقاء العرب معانا وننساق وراء مواقع محرضة عاوزة تعمل فتنة بينا وسياسة مصر تتسم بالاعتدال والتوازن والانضباط الشديد تجاه الجميع فى الداخل والخارج".
وواصل:"بتابع مواقع التواصل وبشوف إنه ساعات حماس زيادة وتجاوز فى الكلام عن موضوعات خاصة بعلاقتنا مع أشقائنا وده لازم أمر ننتبه إليه كويس وعلاقتنا طيبة بالجميع وده منهج الدولة المصرية ماشيين بيه مش النهارده بس ولكن من أول ما توليت المسئولية".
أكمل:"إحنا دايما مفيش تصريحات سلبية تسىء لأشقائنا وما ننساش وقفتهم ولو كان فيه خلاف مع دولة شقيقة خلال السنين اللى فاتت كنت عارف إننا هنتجاوزه حتى الأزمة مع إثيوبيا فى سد النهضة بتلاحظوا إننا ما بنقولش كلمة واحدة تسىء ولو فيه تصريح هنقوله كدولة بشكل رسمى ولو ما قولناش يبقا الأمور ماشية طيبة".
